Izenbururik gabe (2002)
Akrilikoa DM gainean
84,5 x 84,5 cm
BA Bilduma
Erregistro zk.: 2002.52.1
Idoia Montónen margolanak karga psikologikoa du, eta ezinezkoa da hura ez nabarmentzea. Bere iruditeriak groteskoa ukitzen du kutsu espresionista eta surrealista nabarmeneko figurazio batean. Gaika aztertzen ditu prozesu organikoak, objektu batzuk ulertzeko erabiltzen dugun izaera animista, bizigabetik sor daitekeen energia edo imajinatu besterik egiten ez duguna. Bere konposizioak forma dinamikoz eta tentsioz beteta daude, baita artifizioz, apainduraz eta gama kromatiko biziz ere.
Lan horretan bere lanaren alderdi horiek guztiak aurkitzen ditugu, baita irudiak handizkatzeko duen joera ere. Unibertso sinboliko horretatik abiatuta, Idoiak izaera oniriko eta eskatologikoko eszenak eraikitzen ditu, pentsamendu arrazionalaren mugak desafiatzen dituztenak eta inkontzientearen desira, beldur edo pentsamendu ezkutuenak agerian uzten dituztenak.
Idoia Monton Gorostegui (Donostia, 1969) pinturan, collagean eta marrazketan ibilbide sendoa duen artista bisuala da. Euskal Herriko Unibertsitatean Arte Ederretan lizentziaduna, Artelekuko tailerretan ere trebatu zen. Bere karreran zehar egunerokotasunari sakon lotutako praktika artistikoa garatu du, iragazki eszeniko batetik igarotzen dena: bere margolan eta collageak eguneroko bizitzako irudietatik abiatzen dira, bere begirada sinboliko eta poetikoaren bidez eraldatzen ditu, eta horrekin bere inguruneari, errealitate sozialari eta garaikidetasunari buruz hausnartu ahal du.