Sin título [Izenbururik gabe] (2000)
Litografia
75 x 55 cm / 82,6 x 63,6 cm, markoan sartuta
BA Bilduma
Erregistro Zk.: 2000.29.1
Giza itxurako figura bat, ziurrenik emakumezkoa, lerro eta forma kurbatuen sistemaz inguratuta ageri da; sare, egitura edo kaiola arin baten antza du. Gorputzaren eta euskarriaren arteko elkarreragin hori Salazarren lanaren ezaugarri da: artistak bere obra ironiaz eta kritikaz blaitzen du, egungo bizimoduaren balio eta ohiturak zalantzan jarriz.
Figuraren eta haren egituraren arteko tentsioak artistaren laneko gai errepikakorrak ekartzen ditu gogora: identitate femeninoa, haren irudikapena mugatzen duten mekanismo sinbolikoak eta muga horiek beraiek ere auzitan jartzeko beharra.
Grabatuaren erabilerak aukera ematen dio artistari egitura-kontzeptuak modu abstraktuagoan esploratzeko, gorputza moldatzen, eusten edo mugatzen duten konposizioen bidez. Ikuspegi honek erakusten du nola igaro den Salazar material fisiko eta eskultorikoetatik —Corsés (1995) seriean edo Mujer campana (1999) lanean ikus daitekeen bezala— hizkuntza grafiko lauago batera, betiere giza gorputzaren inguruko interesa eta hura definitzen duten egitura sinbolikoez egindako gogoeta kritikoa galdu gabe.
Dora Salazar Romo (Altsasu, Nafarroa, 1963) diziplina anitzeko artista da; bere lanak eskultura, marrazkia, grabatua, eszenografia, argazkigintza eta bideoa uztartzen ditu. Arte Ederretan lizentziatu zen Euskal Herriko Unibertsitatean eta Eskultura espezialitatean doktoretza egin zuen. Bere ibilbide artistikoaren hasieran, material birziklatuak eta hondakin-objektuak erabili zituen, egunerokotasunetik abiatuta forma eta espazioaren esplorazioa proposatzen zuten eskulturak sortuz. Ondoren, arreta giza gorputzean jarri zuen, bereziki emakumezkoaren irudian, identitatea eta haren irudikapena mugatzen duten mekanismo sinbolikoak ardatz hartuta. Salazarren piezek arintasun bisuala eta karga sinboliko handia dute bereizgarri; gorputzak sareen, egituren edo bilbaduren bidez eutsita ageri dira, eta horiek, aldi berean, bai euspen fisikoa bai haien gaineko egitura sozial sinbolikoa iradokitzen dute.